壁畫藝術家Bao Ho | 專訪 | 牆上的幻想世界

壁畫藝術家Bao Ho | 專訪 | 牆上的幻想世界

Bao Ho

中意畫畫中意貓，最近迷弓道，主要畫牆畫插畫，有興趣就畫。除咗香港都會去其他地方畫牆，美國、歐洲、澳洲等地都有畫過，接商業project為生，都托賴大家畀我畫自己嘢。

Q1. 你對畫畫的興趣始於日本漫畫，當中那些元素令你由喜歡看漫畫變成喜歡畫畫的人？

“我諗係世界觀同想像力，細個喺屋村長大，屋企冇太多資源，可以接觸嘅野好少，變咗自己嘅世界好局限；但漫畫世界無窮無盡，乜都有可能，畫得出創作得出就有，睇睇吓就想自己試吓畫。《火之鳥》和《幽靈公主》影響我嘅世界觀同風格最多，不過以漫畫家嚟講，我最崇拜浦澤直樹。”

Q2. 沒有藝術背景的你自學成材，可以分享一下你是如何建立自己的個人風格？

“最初冇特別諗風格呢樣嘢，畫畫吓自自然然就變成咁，而大家又認得，咁又變咗風格。不過最近我諗，所謂風格形成，要好清楚自己中意乜嘢，同埋堅持自己中意既嘢，唔會因為外在意見而去改變自己喜好掛，我咁講係因為自己幾年前都有掙扎過，想自己畫得型格啲，想人讚自己畫嘢好型，但試完又唔覺得滿足，結論係，畫得開心最緊要。”

Q3. 你在意大利初嘗畫壁畫，從此開啟你的藝術創作生涯，當時你對壁畫的第一印象是什麼？

“當時覺得畫壁畫好好玩，啲人會自己行過嚟同我講嘢交流，又可以留啲嘢喺唔同地方，畫紙嘅話要自己攞出嚟畀人睇，好似尷尷尬尬咁，但畫牆大家行過都會見到，好自然就畀到人睇，啲人都好自然會行過嚟吹水，又因為咁識咗好多朋友。”

Q4. 你的創作足跡遍布世界各地，如果要你挑選一個地方，那個地方的藝術氛圍最令你印象深刻？為什麼？

“氛圍嚟講，我會話係Bristol嘅Upfest, 因為佢有超過幾百個artist同場畫嘢，相關部門又會封晒成個區域畀我地畫，幾千個本地人同外國遊客會特登嚟睇。我當時用鷹架畫嘢，附近啲人會自動嚟幫我手搬，又有好多父母帶小朋友攞住本畫簿搵artist簽名等等，成件事係一個好大型嘅年度event咁。”

Q5. 你的壁畫故事靈感通常來自哪裏？你的原創角色是你自身或身邊事物的反射嗎？

“我諗係，多數都係自己身邊嘅嘢，自己中意既嘢，聯想咁樣串埋一齊，邊畫邊諗入面啲人仔啲動物做緊乜嘢，有乜嘢互動，我想佢哋喺一個乜嘢環境生活，又或者其實係我自己想喺一個乜嘢環境生活。”

Q6. 創作對於現階段的你代表着什麼？跟以往有什麼不同？

“宜家我會覺得創作變番單純嘅創作，就係想做就做，唔想做就放低做其他嘢，唔想當係工作咁應付咗就算，我想自己由衷中意做創作，單純享受畫畫呢件事，感受用筆畫落紙或者牆嘅觸感，想一直開心咁畫落去。”

Q7. 你有什麼心得想跟希望從事藝術創作的人分享？⁠

“盡量客觀咁去評價自己嘅作品，唔好睇得自己太高，都唔好踩得自己太低，要清楚自己嘅水平，要知道自己做緊乜嘢，好嘅嘢保留、發揮，唔好嘅嘢諗辦法改進，然後就keep住做啦！”

-

香港本地藝術家介紹｜Bao Ho

——

藝術無處不在，那麼藝術家呢？

我們想將那些在城市裏默默畫、默默拍、默默創作的香港本地藝術工作者，由工廈、街頭或家中帶到日山，讓更多人認識他們對藝術獨一無二的視野，了解他們作品背後的創作理念等，這一切源於我們深信，用心創作的藝術品值得更多人看見。

如欲購買更多藝術家之作品，歡迎於Profile頁面登入日山藝社官網或DM，支持本土藝術！
-
Additional Link:
1. Bao Ho 之Instagram @simplebao
2. Bao Ho 作品官網