藝術家兼設計師 Didi Ng 吳穎賢 | 專訪 | 年輪狂想曲

藝術家兼設計師 Didi Ng 吳穎賢 | 專訪 | 年輪狂想曲

Didi Ng 吳穎賢

以木材為主要材料的藝術家兼設計師Didi Ng 吳穎賢 @dd_ng，於香港理工大學獲得工業設計學士學位，並在香港工作數年後前往芬蘭修讀碩士，主攻家具設計，其後逐步擴展向工藝和雕塑創作。目前工作室設於赫爾辛基。

工作範圍涵蓋雕塑、家具及工藝，主張利用工藝去引發思考，透過雙手在創作過程中激發新想法。除了發掘新技法來呈現木材的特質外，也會在過程中加入自身對木材的解讀和理解，用概念形式表達木材本身的物質性和自然性。

Q⁠1. 曾在香港當室內設計師的您本身已對家具設計感興趣嗎？當年您在雜誌看到一件由學生設計的家具後便決心前往芬蘭進修，為甚麼那件作品對您甚具吸引力？您本身對北歐的設計有甚麼感覺？

“正確嚟講係一系列experimental嘅椅子，嗰系列嘅傢俬用一隻叫Ultramarine Blue嘅顏色，而用嘅物料係一種芬蘭獨有非常薄嘅夾板，系列中每一件傢俬都有好靚又簡單嘅幾何形狀。我當時睇到張圖之後心裏面就好直接覺得我就係想做呢類型嘅嘢，好大部份都係一啲主觀嘅直覺感受。

我本身對北歐其實冇乜概念，亦都唔係話對北歐有啲咩趨之若鶩嘅感覺。設計層面嘅話就係單純覺得好簡約，而生活上嘅話就以為北歐好似聖誕咭上面森林同埋小木屋嘅感覺，咁當然去到之後就發現咗原來完全唔一樣。”

⁠Q⁠2. 可以分享一下在當地進修的事情嗎？為甚麼選擇修讀室內建築系並專注木工的製作？

“頭兩年我仲係專攻家具設計嘅時候，其實未係咁集中喺木工上面發展，學習主要係設計多於製作。我覺得係北歐讀書同香港有一個好明顯嘅差異，就係芬蘭人有好強嘅making culture。雖然未達到工藝嘅level，但每個人都有基本嘅木工概念。思考嘅發展由製作開始，同憑空想像係完全兩回事，發展嘅方向都會好唔一樣，加上木材係芬蘭隨處可見，他們使用木材嘅心態都好唔一樣。喺香港，實木係非常珍貴，但係喺芬蘭就會變得好日常，所以喺學習過程中當你可以冇乜顧慮咁作出嘗試，對創作嚟講就會有好大嘅幫助。而家具喺北歐異常重要嘅原因同天氣有好大關係，因為冬天又凍又黑，大部份時間都留喺屋企，所以家具同人嘅關係就會變得更加緊密，相應對它嘅要求亦都會更加高。

讀室內建築嘅原因主要係因為家具設計係喺佢嘅課程裏面。專注用木材嘅原因就比較複雜，因為我差唔多完成所有課程之後，我發覺家具設計冇我想像中咁吸引，反而我被一門elective嘅雕塑課程所吸引。當時我嘅作品係一片好長嘅木板，上面雕有羽毛狀嘅肌理。我發現木材本身係自帶咗一種隱藏嘅吸引力同埋親和力，喺展覽展出作品嘅時候我發現好多人都會有自己嘅解讀，同埋好想去捉摸同埋聞木材嘅味道，呢種人同天然之間難以言喻嘅關係，令我好想向呢個方向研究，所以就決定用木材做我大部份嘅創作。”

Q⁠3. 進修後以至芬蘭人崇尚的「cottage lifestyle」對您的設計有甚麼啟發?

“最先開始應該係文化差異，因為喺香港成長其實好難得到一個絕對安靜嘅環境，當你去cottage生活一個禮拜，脫離城市生活嘅環境下，你可以得到絕對嘅寧靜。喺呢個情況下你會對你自身生活同存在有更多嘅思考，老土啲講係真係可以洗滌心靈，同埋拋開煩惱。

喺創作層面上，喺cottage裏面用嘅嘢好多時都係老一輩用手做，而好多嘢都係取材自然。喺我寫論文嘅時候，我花咗一啲時間去研究cottage嘅美學，打個譬如門柄佢哋會用原木樹枝去做。基本上樹枝嘅形狀決定咗門柄嘅形狀，我個人認為喺整呢個門柄嘅時候重點唔係喺工藝上，而係喺尋找嘅過程，再諗深一層其實係製作者尋找合適嘅物料碰撞嘅緣份，而促成呢個緣份係尋找嘅時間，再者每一個人都係獨立嘅存在，就算唔同嘅人用同一個方法做同一件嘢，個結果都會唔一樣。喺呢件事上會令到我學習到其實創作唔一定喺動手製作方面，過程其實涵蓋好多範疇。美學可以喺用好多方面去定義，而且世上係冇絕對嘅美學。

另外一個例子就係劈柴，佢哋會劈柴生火，對我哋香港人嚟講可能有啲陌生。當我研究木材嘅時候，我就比佢哋嘅自然肌理所吸引。用一把斧頭劈開一件木材嘅時候，你會有兩個自然嘅結果，一個非常簡單嘅動作重複100次，你就會有大量唔同嘅自然結果，我就發現美學原來唔係一件好複雜嘅事，重點係我哋點樣去解讀欣賞。”

Q⁠4. ⁠您是如何一步步在芬蘭建立自己的家具設計師和藝術家事業？您認為當地的藝術氛圍如何？

“我喺讀書嘅時候已經有一個強烈嘅概念就係我唔打算打工，因為我一早已經有個念頭就係想做自己嘅創作。我嘅思想比較絕對，除非我真係冇晒錢，否則我都盡量唔會返part-time。因為我認為就算係相關類型嘅工作都好，佢都會影響創作嘅思維。我喺返學嘅時候已經有個概念要儲起一個portfolio同埋諗自己心裏面理想嘅profile，所以我大部份嘅時間都係埋頭苦幹喺workshop度工作，除咗做學校嘅嘢之外，我會花好多時間做自己嘅創作同埋嘗試。而我喺畢業嘅前一年，我就去申請好多唔同嘅展覽，希望喺歐洲唔同嘅國家展出我過去幾年做嘅嘢，睇吓唔同人嘅意見同埋尋找唔同嘅機會。喺展覽度又會認識唔同嘅人，圈子就會自然慢慢咁樣擴闊。

圈子嚟講我認為藝術氣氛係唔錯，因為唔同嘅藝術家都會好願意互相幫助，而且當地有唔少嘅藝術家資助，如果你去展覽嘅話都可以幫補到好多。不過話雖如此，其實喺歐洲做藝術都係面對一樣嘅困難，就係貧窮。我成日都聽到有個概念覺得外國個氛圍好啲，藝術欣賞嘅層面上，的確對比起香港接受程度較高，但係要成就一個全職藝術家都係非常非常之困難，我嘅藝術家朋友都係面對同香港藝術家一樣嘅問題。”

Q⁠⁠5. 為甚麼鐘情製作具雕塑性及實用性的家具，並在設計與藝術之間取得平衡有所追求？

“鍾意家具最主要都係情意結，因為我開始接觸創作就係由家具開始；而雕塑就係我喺好後期先開始接觸嘅嘢；而做藝術，無論係創作同埋欣賞嘅開放性，我認為喺設計上得唔到，所以先會開始做雕塑類型嘅東西，甚至將做雕塑嘅方法同家具混合。就我個人認為，設計同藝術其實係兩種唔同嘅追求，唔需要尋找平衡。我認為藝術係由內向外，設計係由外到內。對我嚟講藝術係一種個人對世界嘅理解，有一種無窮嘅開放性，亦都有一種力量去啟發其他人。反觀設計嘅存在係呈相反嘅方向，本質上係先理解人嘅需要，而再去尋找進步嘅可能性。有時候佢哋貌似會有交疊嘅可能，但係我認為佢哋係兩個範疇嘅嘢，所以喺我創作嘅時候我會分開兩種唔同嘅心態去做，概念上我盡量唔會將佢地混淆。”

Q⁠6. 可以介紹您的最新展覽《The Nature of Wood》的創作過程嗎？你是如何從紡織物上的褶皺（textile pleating) 中獲得靈感，並把它應用到木材設計上？

“展覽裏面主要涵蓋嘅係我呢兩年裏面不斷鑽研某幾種木材處理技法嘅結果。展覽作品裏面有家具，亦都有雕塑作品，其中我亦都用技法去分類為唔同嘅系列，但我冇刻意去諗一個主題。每一個技法嘅重點都係在於彰顯木材本質上嘅物料，喺不干擾木材特性本質嘅情況下嘗試將木材嘅另一面呈現出嚟。

喺呢個展覽裏面，我每做一件新嘅作品就會對比前一件嘅作品，我唔希望我嘅作品會有好單純嘅重複，無論喺技法上定概念上，我都想有向前嘅感覺。好多時概念係由我動手做嘅時候萌生，所以作品嘅變化比較隨性。有啲作品貌似差唔多，但係如果你仔細睇其實佢有微細嘅不同。

其實靈感唔係直接來源自textile，而係來源自劈柴嘅肌理，而呢啲木材上面嘅肌理嗰種線性同埋流動感令我聯想到布藝，然後我就嘗試用木雕嘅方法將木材變得輕同薄，令到佢有布藝嘅質感，所以其實佢哋係有相互啟發嘅關係。”

Q⁠7. 身為在海外發展的藝術家，有甚麼心得想跟其他創作人分享？

“我覺得海外同本地嘅藝術家面對嘅困境都係一樣嘅，喺唔同地方創作嘅人佢哋都有一個共通之處，就係無比嘅耐力，而呢一個耐力係來源自對藝術嘅熱誠。我覺得藝術永遠都係逆主流，做藝術有個義務去令普羅大眾理解同接觸藝術，所以對藝術嘅熱誠同鍾愛要足夠強大先至能夠支撐自己持續做落去。因為理由夠大煩惱就唔再煩惱，再者盡量唔好理會身邊其他人點睇你。我覺得心態上如果搵到一個足夠自己做呢樣嘢做一輩子嘅理由，得閒提醒吓自己，會對藝術創作有好大嘅幫助。”

-

本地藝術家介紹｜Didi Ng 吳穎賢

——

藝術無處不在，那麼藝術家呢？

我們想將那些在城市裏默默畫、默默拍、默默創作的香港本地藝術工作者，由工廈、街頭或家中帶到日山，讓更多人認識他們對藝術獨一無二的視野，了解他們作品背後的創作理念等，這一切源於我們深信，用心創作的藝術品值得更多人看見。

如欲購買更多藝術家之作品，歡迎於Profile頁面登入日山藝社官網或DM，支持本土藝術！
-
Additional Link:
1. Didi Ng Instagram: @dd_ng
2. Didi Ng Official Webside
3. Wood Pleats by Didi Ng Wing Yin - Thisispaper
4. Get to know Hong Kong's first Loewe Foundation Craft Prize 2025
5. Didi Ng Wing Yin - Spazio Nobile