磨刀三年「劇場界《天能》」 《Ellie, My Love》七月首登台灣

磨刀三年「劇場界《天能》」｜《Ellie, My Love》七月首登台灣

本地得獎劇作《Ellie, My Love》磨刀三年，即將於七月走出香港，以全新面貌登上台灣舞台。此劇改編自香港推理小說作家陳浩基作品《第歐根尼變奏曲》中的同名短篇小說，2022年首演時以極具美感的形體動作呈現時空倒敍，被坊間譽為「劇場界《天能》」。三年過去，作品及演員均經過不同的沉殿及歷練，更嘗試為作品注入敍事策略，提升劇情張力，讓觀眾在觀劇後仿如經歷夢一場。日山藝社邀請《Ellie, My Love》演員兼集體戲劇構作之一的梁景堯（Terrence）分享團隊背後的創作理念以及對藝術的重新思考。

以藝術突破語言隔膜

儘管演出場地由香港變成台灣，創作團隊並無因此將原先的廣東話演出轉為國語。去年Terrence曾與團隊遠赴台灣以國語演出另一劇目，卻意外地收到觀眾期望他們以母語作為演出語言的反饋。「當地人接受到我哋用國語，但佢哋都希望我哋用返自己嘅語言去講返自己嘅故仔。其實好多巡演都唔會因應當地而去改變原有嘅語言，所以我哋都希望透過今次沿用廣東話演出，令當地嘅觀眾透過呢種語言同埋我哋嘅聲線去感受呢個香港嘅故事。」儘管使用熟悉的語言進行演出，場地的變化亦令演員在演出上更具挑戰性。「台灣嘅舞台相比JCCAC（賽馬會創意藝術中心）至少深一倍以上，我哋所用到嘅聲線同埋力量都比喺賽馬會場地嘅排練感覺和意識要強好多。」

肢體動作呈現倒敍與人性

《Ellie, My Love》的劇情以倒敍的形式開展，演員需要配合豐富的肢體動作進行演出的同時，亦要呈現出上一秒的劇情當中所蘊含的各種複雜情緒，難度相當之高。為了讓新版本中的倒敍畫面來得更具張力，團隊由角色的原型以至其與他人的關係去發展出一套有別於以往的肢體動作。「將一種唔係淨係當下發生，而係可能上一日或者呢個故事發生嘅事累積出嚟嘅嘢以gesture嘅形式呈現，當呢啲形態成立嘅時候，其實嗰個picture可以充滿咗好多故事同力量。除咗比觀眾睇到故事嘅另一個層次之外，亦都比到演員一個情感上嘅載體，我哋可以透過呢啲形體動作去幫助觀眾進入角色嘅內心世界。」

為此，一眾演員亦埋下不少苦功。「我嘅難度就係我下盤冇咁穩定，唔識同上身去配合，喺訓練嘅時候就喺地下做一啲唔同嘅動作，每一次都係流晒汗，大家一齊搭集體去探索呢個過程，我哋中間係唔會講嘢。導演就會引導我哋去focus喺心態，我哋要有一個適合嘅心態先能夠好輕鬆好有意義咁樣去設計唔同嘅動作。」

此外，團隊更參考了漫畫簡潔有力的敍事手法。「六格漫畫每一格都好細格，但都有少少背景，其實當中包含嘅張力都好強。一套漫畫會衍生好多外傳，如《鋼之鍊金術師》及《進擊的巨人》，你返睇會發現呢啲角色其實內心係俾你心目中諗得嘅更加深入。」

回歸藝術之本

Terrence除了是演員的身份之外，他與劇中的幾位演員同時擔任「集體戲劇構作」一職。「導演Curtis想帶出嘅嘢就係我哋作為演員，其實唔單只係角色上嘅嘢或者分析自己同呢個劇本嘅關係，而喺我哋點樣一齊去成立一個故事，點樣去塑造一個世界觀。」

Terrence與創作團隊為了是次的台灣演出，對劇本重新作出深層次的審視與思考，過程中亦獲益良多。「我哋作為香港嘅舞台工作者，好多時做啲商業啲嘅嘢或者做啲好大嘅劇場時，都冇乜機會可以咁樣去設計藝術或者諗我哋有啲咩想講，呢種機會喺香港喺好難得。兩個幾月嘅排練有一個月喺訓練緊我哋嘅心態，創造咗一個自己嘅時空同自己嘅世界，而呢樣嘢係無可取代的。」

(圖片來源：官方)
-

《Ellie, My Love》演出資訊：

7月4日(五) 14:00 含演後座談

7月5日(六) 14:00/ 16:30

7月6日(日) 14:00 含演後座談

地點：臺南市立圖書館新總館 6F哇劇場 (永康區康橋大道255號)

時間：約105分鐘

對象：建議12歲以上

報名：https://reurl.cc/5KyrxG （免費入場）

語言：廣東話
-
相關連結：
1. 結合形體藝術《Ellie, My Love》同名推理小說搬上舞台｜何故專欄
2. 《Ellie, My Love》舞台劇 @Theatre Space 劇場空間