油畫藝術家Heidi Lai ｜專訪 ｜平凡不平凡

油畫藝術家Heidi Lai｜專訪 | 平凡不平凡

油畫藝術家 Heidi Lai: 我只係想記錄低我哋係點樣生活

三年前搬到悉尼開始賣畫生涯，由畫畫導師變成畫家。Heidi @heidi.lai.art 的油畫作品以日常生活場景為題材，捕捉轉瞬即逝的美感，嘗試喚起觀眾對平凡一刻的共鳴，欣賞生活中細微而珍貴的時刻。她曾於澳洲及倫敦舉辦個展及聯展，並多次入選國際藝術比賽，包括 Australia National Emerging Art Prize、Jackson’s Art Prize 及 Royal Institute of Oil Painters Annual Exhibition。

Q1. 可以分享一下你的油畫旅程嗎？

"以前喺香港教油畫同塑膠彩，間唔中都會畫吓畫，直到搬咗嚟悉尼之後就有賣畫呢個念頭。我開始用油畫去畫日常生活嘅場景，拎去art fair賣，反應幾好，就一直做到而家。有時啲人見到我啲畫，會主動講下佢哋嘅故事，可能佢哋都去過嗰個地方，做過類似嘅事情，就開始咗一個對話，呢種交流都係我繼續創作嘅動力。"

Q2. 你喜歡透過油畫記錄日常寧靜時光，那些畫面需要具備甚麼元素讓你當下便能決定你的繪畫題材？

"通常都係因為光影令我留意嗰個畫面，又係啲好日常冇留意嘅嘢，我就會好想畫佢出嚟。所以我有時行街見到我鐘意嘅畫面，我就會影相，再研究下可以點呈現某種效果。我唔想set死一個題材畀自己，所以見到令我有感覺嘅畫面我都會影低先，好多時都係返到屋企睇相先知自己想畫咩，但有時某啲畫面確實會有「一見鍾情」嘅時候，不過比較少。"

Q3. 你的畫風偏向印象派，為什麼喜歡這樣的處理？

"其實我有段時間都畫得好寫實，但覺得「畫」同「相」係兩樣嘢，功能上可以唔一樣。日日見到嘅畫面可能好似好悶，亦都唔覺得係特別靚，所以想用顏色同筆觸去畫得動態啲，浪漫啲。我唔想自己嘅畫屬於啲咩派別，我想有多啲空間去explore唔同畫法。我只係想記錄低我哋係點樣生活，希望大家多啲欣賞每個小日子嘅態度。"

Q4. 香港與澳洲的brief moments給你怎樣不同的感覺?

"香港每分每刻每個空間都有嘢發生緊，可以混亂得嚟又好有活力，雖然置身當中可能有種壓逼感；而澳洲就好靜、整齊，可能會有種悶嘅感覺。兩個地方雖然感覺唔同，但都係我日常生活嘅一部分。我覺得用欣賞嘅眼光去睇，學識感激自己擁有嘅一切，呢啲「brief moments」就會變得好珍貴。"

Q5. 你現時正在籌備年末分別在倫敦及悉尼舉行的兩場藝術展，可以分享一下各至的主題以至籌備參展的心得嗎？

"我會帶啲細細幅、以街市為主題嘅作品去倫敦嘅展，因為未去過當地，所以想先試下水溫。至於悉尼嘅展，就會偏向呈現澳洲日常，例如餐廳、café 等等。

其實每次畫展前，我都係不停咁畫，冇咩固定計劃，因為作品賣得出、觀眾有咩反應，唔係完全可以控制嘅。當然，我喺澳洲賣畫幾年，對市場同評價都有大概概念。Art Fair 嘅觀眾好多元，通常會有資深收藏家、畫廊人士、一家大細同學生，所以我會準備唔同大小、價位嘅作品，同時揀幾幅畫去印art print，擴大客源。"

Q6. 可以分享一幅你較為喜歡的作品背後的故事嗎？

"其實鍾意嘅話有好多，可以介紹呢一幅 《Behind the Shadow》。有日喺長洲行過呢間海味舖，我覺得呢啲舊舖頭好有香港特色，亦都唔多見，所以好隨意咁影咗啲相，好想記錄一啲有香港特色嘅舊舖，好想畫出嚟。其實幅相影得唔好，啲光影冇咩特別，如果我照畫出嚟應該會好悶，所以想喺顏色上有啲更改，唔重要嘅地方可以忽略。呢幅畫可以話係我第一次用呢種方式去處理，而之後出到嚟嘅效果我都收貨，所以算係幾鍾意。"

Q7. 有沒有甚麼心得跟想在海外發展藝術事業的人分享嗎？

"除咗老套咁講句「要堅持」之外，我覺得認清自己嘅位置都好重要。如果淨係顧住做自己鍾意嘅嘢，而完全唔理大眾嘅反應，其實好難長遠發展。點樣喺大眾需求同自己意願之間搵到平衡，未必容易，中間一定要經歷好多 trial & error。

不過我覺得喺海外發展有個好處，就係機會多咗。無論參加市集、定係去接觸畫廊或專注喺網上發展，都可以當係一個實驗過程，睇下自己喺邊方面可以再做好啲。多啲去同人交流、傾計，可能無端端多咗機會。"

-

香港本地藝術家介紹｜Heidi Lai

——

藝術無處不在，那麼藝術家呢？

我們想將那些在城市裏默默畫、默默拍、默默創作的香港本地藝術工作者，由工廈、街頭或家中帶到日山，讓更多人認識他們對藝術獨一無二的視野，了解他們作品背後的創作理念等，這一切源於我們深信，用心創作的藝術品值得更多人看見。

如欲購買更多藝術家之作品，歡迎於Profile頁面登入日山藝社官網或DM，支持本土藝術！
-
Additional Link:
1. Heidi Lai之Instagram: @heidi.lai.art
2. Heidi Lai官網
3. Shop art by Heidi Lai - 6 artworks for sale on ... Bluethumb Online Art Gallery