原形雕塑師RAY.WONG｜專訪 「無中生有」的創作魂

原形雕塑師RAY.WONG｜專訪｜「無中生有」的創作魂

RAY.WONG

香港原型師、雕塑家。工作經驗逾20年，創作領域包括玩具首板製作、電影道具、人像雕塑及藝術創作等。近年積極推廣手雕教學，強調基本工藝根底，與時並進，相信對科技的過份依賴將會本末倒置，從而被取代。

Q1. 你的藝術創作旅程是怎樣開始的？

“由於兒時屋企經濟環境唔算太好，覺得市面上嘅玩具滿足唔到自己，加上熱愛動漫同電影，便想參與製作科幻電影道具，所以由自學做起。早年不斷參加唔同嘅比賽展示自己嘅作品，無意間得到工作機會，認識咗很多前輩。

原型雕塑最吸引之處在於「無中生有」，只要有基本嘅材料就可以無限發揮，尤其鍾意真實立體創作，好有滿足感！每一件作品都由自己親手製作出嚟，都係獨特而且無可取代，帶比我無比嘅快樂。

創作題材方面，所有生物都鍾意，尤其人體實在太完美！表情、肢體嘅豐富、唔同性別、年紀、身形、閱歷都可以有唔同嘅效果，帶俾人唔同嘅感受。個人好鍾意以老人家作為題材，每一條皺紋都有一定嘅規律，卻有唔同嘅脈絡，從中可見其人生閱歷、思想通透同豁達嘅智慧，令我可以學習好多人生哲理，好有生命力。”

Q2. 你為許多原創角色製作雕塑，除了追求像真度，你是如何為作品注入靈魂？

“對於寫實人像，像真度只係基本。我會嘗試閱讀當中嘅生平、了解人物嘅心境和性格。如果可以會先認識了解，出嚟嘅作品就會多一份層次。”

Q3. 你平常會做甚麼練習訓練雕塑技巧？

“我會研究人體結構同運動解剖學，認識骨骼同肌肉嘅結構、生理機能、力學原理，從而掌握韻律同節奏感。雕塑速寫訓練可增強判斷力同埋準確度，而鍛鍊基本素描繪畫則可加強觀察力同表達方式。”

Q4. 製作人像雕塑最大的挑戰是甚麼？你花最長時間製作的一件藝術作品是什麼？

“我認為箇中挑戰在於每個人對人物都有既定印象；人像雕塑主要分三個層次：形似 （ 外型、相似度）、實似（ 實在感、質感）、神似 （ 神粹、風範、意境）。三樣具備嘅話就屬於巨匠級，神似而形不似，屬於抽象藝術級，而我仍然喺追求同探索當中。

最長時間製作嘅作品可能係自己原創嘅「行者」系列，我嘗試用全手雕刻微型戰棋，製成品只有25-30mm，當中加入咗很多東方合成科幻風格同埋花紋嘅細節，而為咗保留真實嘅立體感，角色嘅肌肉面部都製作得非常迷你仔細。”

Q5. 那個藝術時期和藝術家對你深受影響？

“意大利文藝復興時期嘅米高朗基羅對人體結構嘅精準描繪、充滿力量、動感嘅構圖，追求完美嘅態度對我影響非常深。”

Q6. 你曾在街頭即場創作雕塑，可以分享那些體驗嗎？

“我喺布魯塞爾用咗黃昏嘅兩個半鐘雕刻「尿尿小童」，畢竟用雕塑寫生都比較少，但因為旅程嘅裝備而局限成品嘅大細，不過已經好享受！始終喺歐洲嘅藝術文化比較濃厚，所以融入當中嘅感覺好好，途人都非常好奇、唔吝嗇咁讚賞，打破領域同言語之間嘅距離，更要求合照，實在令我意想不到。”

Q7. 你認為應如何抱著對創作的熱情？

“一切源於唔滿足、不斷挑戰。因想進步同埋嘗試同展現唔同嘅風格，所以我都習慣留低舊時嘅作品回望做比對，從而推動自己進步、向前進發，希望堆疊自己獨有嘅人生軌跡。”

-

香港本地藝術家介紹｜RAY.WONG

——

藝術無處不在，那麼藝術家呢？

我們想將那些在城市裏默默畫、默默拍、默默創作的香港本地藝術工作者，由工廈、街頭或家中帶到日山，讓更多人認識他們對藝術獨一無二的視野，了解他們作品背後的創作理念等，這一切源於我們深信，用心創作的藝術品值得更多人看見。

如欲購買更多藝術家之作品，歡迎於Profile頁面登入日山藝社官網或DM，支持本土藝術！
-
Additional Link:
1. RAY.WONG 之Instagram @ ray.wongstudio
2. 玩具堂 [ 幕後玩家 ] Ray Wong 香港原型師 @香港原型雕塑展