沙畫藝術家鍾雪 | 專訪 | 積沙成塔的旅途

沙畫藝術家鍾雪 | 專訪 | 積沙成塔的旅途

沙畫藝術家鍾雪：希望大家透過沙表達更多自己

投入沙畫藝術創作多年，曾為多個著名國際品牌、電視節目等製作沙畫作品及擔任表演嘉賓，致力宣揚沙畫藝術。曾連續三年入選香港貿發局「香港創意設計力量」之本地設計師，以創新及感動人心為沙畫創作宗旨。現為香港沙畫協會會長、心流沙畫藝術學院校長及雪沙藝術創作創辦人。

Q1. 你心目中的沙畫是一門怎樣的藝術？

"沙畫係一門富有感染力、充滿感動嘅藝術，透過細小嘅沙畫，將好大嘅故事，逐步逐步呈現喺大家眼前；佢亦都充滿創造力，透過光影同沙流動，變成千變萬化嘅圖畫同故事。我本身冇畫畫嘅底子，係因為沙畫令我開始研究畫畫。最吸引我嘅地方係我能夠借沙畫說話，佢嘅神秘及變化令人目不暇給。佢亦都俾咗好多滿足感我，讓我可以借呢個媒介，將每一個人嘅回憶記錄延續。"

Q2. 你曾以易學難精來形容沙畫，這門藝術除了沙和光箱外，在創作上需要怎樣的技巧？

"畫沙畫首先要認識如何控制沙，透過唔同嘅動作，令沙嘅流動喺你手上得心應手，每一個力度同動作，都會影響每一個既定嘅圖畫，所以好多時要隨機應變，再加以創造。而每一個畫面轉換時要吸引觀眾，所以要花好多時間去感受去研究。現場表演也是充滿挑戰，因為要喺短時間內完成一個吸引、優美、感動人嘅故事。我認為沙畫每個部份都充滿挑戰性，但每一個挑戰都成為我嘅動力，只要耐心熟練，所有嘢都變得唔再困難了。

材料嘅使用對作品都有好大嘅影響，唔同嘅沙可以畫上唔同嘅作品。粗嘅沙帶點朦朧感，幼嘅沙能表達細緻畫面，所以有時候我都會利用唔同嘅組合去創作一件作品。至於沙畫使用嘅光箱，唔同嘅質面都有影響沙嘅流動性，令作品的線條變得不一樣。"

Q3. 你透過沙畫來敘述故事的創作過程是怎樣的？

"沙畫可以係一個幫人敘述故事嘅媒介，亦都係一個充滿吸引力嘅藝術，可以表達自己想說的話。創造故事之前就好似作文咁，需要起承轉合，然後設計沙畫嘅構圖，因為沙畫製作一般不會很冗長，所以只需要透過簡單的主題畫面，就能表達出故事嘅重點。我哋好多時都會放大主體，令到大家容易明白嗰一幅沙畫嘅重點，並於短時間內了解當中想要表達嘅想法。"

Q4. 你曾形容沙畫是與音樂是分不開的，你認為兩者的結合能為創作作出怎樣的昇華？

"沙畫就好似電影，需要有聲音，整個故事嘅起承轉合便更加突出，所以我哋嘅製作好多時會用原創音樂。譬如激動嘅時候音樂會澎湃一點，開心嘅時候會輕快點。音樂喺沙畫好好嘅夥伴，令整個製作更動人。"

Q5. 你曾於歐洲的旅行中開展個人沙畫創作企劃，為什麼會有這樣的構思？

"我好鍾意沙畫，好想知道喺唔同地方沙畫係點樣嘅，亦希望透過沙畫將世界各地嘅人連繫起來。而我喺接觸沙畫嘅過程中，好多時都喺社交平台同各地嘅沙畫藝術家溝通，所以都好希望有機會親身接觸，唔再係隔住空氣說話，感受大家嘅情感、文化及日常生活，了解大家一同鍾意沙畫嘅感覺。返嚟香港之後 ，更加希望將我認識到嘅每一種沙畫分享俾大家，令大家可以透過沙，放低日常生活嘅壓力。 透過沙，一齊傾偈；透過沙，表達更多自己；透過沙，將人連繫埋一齊。"

Q6. 可以跟我們分享一幅你印象最深刻的沙畫作品嗎？

"曾經做過好多充滿回憶嘅故事，沒有最深刻，因為每一個都好深刻，真摯嘅情感表達永遠令我好難忘。曾經記錄多個晚期離世嘅故事、長者做俾成人兒子嘅生日故事、相識結婚嘅愛情故事、小朋友嘅成長記錄、公司嘅發展歷史等，對我嚟講每一個回憶都十分珍貴。"

Q7. 從護士到沙畫藝術家，這趟旅程中你最大的感受是什麼？有甚麼心得可以給同樣想轉換跑道發展個人興趣的人分享？

"最大嘅感受係過程必定有得有失，學懂喺每一個希望裏面尋找快樂。相信每個人都充滿可能性，今日你可能做緊一個穩定但不合乎自己心意嘅工作，但只要一直尋找，找到自己鍾意嘅嘢，願意努力堅持去發展，總有人睇到，就算未必太順利，喺你人生入面總算試過，唔會後悔。"

-

香港本地藝術家介紹｜鍾雪

——

藝術無處不在，那麼藝術家呢？

我們想將那些在城市裏默默畫、默默拍、默默創作的香港本地藝術工作者，由工廈、街頭或家中帶到日山，讓更多人認識他們對藝術獨一無二的視野，了解他們作品背後的創作理念等，這一切源於我們深信，用心創作的藝術品值得更多人看見。

如欲購買更多藝術家之作品，歡迎於Profile頁面登入日山藝社官網或DM，支持本土藝術！
-
Additional Link:
1. 鍾雪之Instagram: @snowsandarthk
2. snow and art hk 官網