菲林攝影師Sum Kwok ｜專訪 虛實之間的曖昧距離

菲林攝影師Sum Kwok｜ 專訪 ｜虛實之間的曖昧距離

菲林攝影師Sum Kwok @ys_kwok_1109_

用菲林作為媒介創作的攝影師，擅長將自己和被攝者的情感和故事放在相片裡。

Q1. 你是怎樣開始接觸攝影？為甚麼專注於人像攝影？

“開始接觸影相嘅時候係中學時期同朋友一齊學，中間斷斷續續自己約下身邊嘅朋友影相。仲記得一開頭嘅時候個社會好興文青文化，我早期嘅作品都係着重於日系嘅調色同埋風格。由於鍾情於嗰種文化，就嘗試接觸菲林相機，之後就被菲林嘅節奏所吸引，就冇乜再點用電子相機。

比起不停咁樣按快門，我鍾意喺有限嘅菲林數目裏面諗好晒之後先影。第一次機緣巧合之下，我嘗試將一啲過去處理唔到嘅情感同痛苦放入去相片裏面，嗰一刻開始，我搵到處理情感嘅避風港。

我好鍾意約一啲唔同嘅人影相。其實與其話我鍾意影相，不如話我鍾意喺拍攝嘅時候同拍攝者交流。每個人都有佢嘅故事，好似都大不相同，對我嚟講好有趣，但係本質上都係離唔開大家生而為人所面對嘅嘢。”

Q2. 最初你是由彩色攝影開始嗎？為甚麼後來轉向黑白攝影？你認為兩者除了色彩上的差異外，你在畫面上的處理會有甚麼不同？

“開始嘅時候我不停去嘗試唔同嘅攝影技巧，對每一樣嘢都好新奇，但當我將一啲唔同嘅技巧使用過後，漸漸地我開始思考攝影對我嚟講係啲乜嘢。一張顏色調得好靚、構圖好有趣同被攝者好靚嘅相片對於我嚟講有咩意義？如果一張相片，只係得前面所提到嘅元素，對於觀賞者嚟講咁樣充其量只係一張「好靚」嘅相，但影到一張好靚嘅相對於我嚟講有啲咩意義？我哋喺平時嘅生活裏面已經充斥咗好多好靚嘅嘢，可能係廣告嘅相片、電影入嘅畫面，而我嘅目標係想影一啲令到人哋睇完會記得嘅相，所以我開始向內咁樣去思考呢個問題。

開始用黑白菲林拍攝，對於我嚟講係一個既新又充滿挑戰嘅嘗試。當顏色從張相片裏撇除之後，點樣去觀察拍攝時候嘅環境係同彩色完全唔同。當我哋冇得用顏色一種元素去吸引觀賞者點樣去睇張相片嘅時候，環境嘅光變得純粹同埋重要。點樣喺一張好靚嘅相片裏面加入一啲元素令到佢有靈魂係我想做到嘅嘢。”

Q3. 拍攝人像攝影時，你主要是讓攝者自由發揮，還是會根據甚麼來為他們作出引導？可以分享一下你的拍攝過程嗎？

“我好主動咁樣去邀請一啲我覺得好有趣嘅人去影相，以前我會鍾意搵定唔同嘅reference之後去影相。近呢幾年除非我啲相係有好特定嘅主題想去將自己想像嘅世界呈現出嚟之外，已經好少搵reference。我覺得大家活在當下，係拍攝嘅過程同被攝者之間嘅交流，自然就會搵到大家想影嘅嘢。當然拍攝出嚟嘅作品亦都會受當時諗緊同經歷緊啲乜嘢而被影響，一般而言，我比較鍾意一啲純粹同埋真實嘅東西，所以我會邀請被攝者帶我去一個對於佢哋嚟講好特別嘅地方，或者當係一個小旅行嘅方式，同拍攝者講我哋會去邊度，之後嘅一切就由當日嘅interaction而定。”

Q4. 你曾寫道”open your heart to strangers”，並視拍攝為一趟療癒的旅程，你認為攝影師與被攝者之間最理想的狀態是怎樣的？

“我覺得攝影者同埋被攝者之間最理想嘅狀態係大家喺拍攝嘅過程都活在當下，好純粹咁樣分享當下我同被攝者想分享嘅嘢，一個可以表達到純粹同真實嘅狀態；而係同唔同嘅人交流嘅機會之中，我哋會更加了解自己。”

Q5. 你的攝影風格曾受那些攝影師所啟發？

“喺開始攝影嘅時候，我有一段時間好鍾情濱田英明，嗰陣時成日都會諗點樣可以影到佢嗰隻風格同埋顏色。而當我開始無再盲目咁跟從之後，我並無再特別鍾情於任何一位攝影師。大家都有唔同嘅風格同值得參考嘅地方。平時我主要係透過去唔同嘅展覽、睇電影同埋社交媒體裏面去發掘一啲我鍾意睇嘅相，而最近呢一兩年我好欣賞三位攝影師，分別係香港嘅Joe Lai，台灣嘅Stanley Lee同埋日本嘅上田義彥。”

Q6. 作為攝影師，你怎樣看待人工智能？你認為它某程度上能為作品帶來怎樣的可能性？

“雖然我自己使用嘅係傳統嘅攝影，大部份作品都係以菲林去影，但我其實都幾鍾意使用AI，我覺得如果適當地使用嘅話係可以將一啲原本要花費好多錢去呈現出嚟嘅場景，利用AI配合輔助將一啲自己想表達出嚟嘅畫面呈現出嚟。”

Q7. 你有甚麼創作心得跟我們分享？

“喺創作上面，老實講我並沒有甚麼可以向大家班門弄斧，但以自己嚟講我鍾意喺創作嘅時候保持一種曖昧嘅距離，我哋可以好赤裸好真實同坦誠咁樣去表達自己內心嘅想法嘅同時，亦都可以保持一點點距離同埋神秘感；係主觀個人嘅真實裏面加入自己嘅創作去修飾一下，係真真假假之間拿捏一個令到觀賞者大概感受到拍攝者想表達啲乜嘢嘅同時，亦唔會知道拍攝者真實想表達係啲乜嘢。真中有假，假中有真，呢樣我稱為「故事性」同「真實性」嘅元素係我除咗顏色構圖光影之外重視嘅嘢。”

-

本地攝影師介紹｜Sum Kwok

——

藝術無處不在，那麼藝術家呢？

我們想將那些在城市裏默默畫、默默拍、默默創作的香港本地藝術工作者，由工廈、街頭或家中帶到日山，讓更多人認識他們對藝術獨一無二的視野，了解他們作品背後的創作理念等，這一切源於我們深信，用心創作的藝術品值得更多人看見。

如欲購買更多藝術家之作品，歡迎於Profile頁面登入日山藝社官網或DM，支持本土藝術！
-
Additional Link:
1. Sum Kwok Instagram: @ys_kwok_1109_
2. 【Lomo LC-A 120 菲林相機】創作者Sum Kwok 用菲林攝影作媒介去